MUSEN HILETA

 

 

J.J. Arreolarekin zorretan

 

 

Aldrebeskoa ulertzen du askok:

baina ahaztea da errazena, ez barkatzea.

 

Nik, hala ere, ez dut ahazten:

muinoraino lagundu nien emakumeak ditut gogoan.

 

Zer gertatu zen haiekin? Muinoan geratu zirela.

 

Nork bere muinoa zeukan, egiaz.

 

Ni, beherantz nator.

 

Eta ez ditut ahazten:

musa bakartiak muino bakartietan.

 

Urteak konplitu dira, promesak ez.

 

Neronen umiliazioetatik urrundu naiz,

umiliazio haiei buruz eskribitu ahal izateko.

 

Urteekin lortzen dena:

gutxi urrundu arren, idaztea.

 

Are, umiliazioa iritsi aurretik idaztea.

 

(Areago: deus ez idaztea).

 

Hilkutxan ikusten zaitut, lasai, luze,

ez lizun eta ez biluzik:

lepoz gora gainezka botoi lotu kastoz.

 

Zure izerdia zurrupatu banuen,

zergatik ez nekien zeure gaixotasunaz deus?

 

Badaude gaiari buruzko ikerketak:

emakumeak albiste txarrak jasotzera

bakarrik joaten zaretela, eta gizonezkook, aldiz,

amaren, izuaren

edo emazteen eskutik.

 

Asko gara zuri so. Zuk, ez duzu inorentzat begirik.

 

Jendeak negar dagi.

Ni, negar eginda etorri naiz etxetik.

 

Muinorantz begiratu dut.

Ez zaude han; bai zerua, ordea.

Ez zaude han; bai urdina, ordea.

 

Maite zenituen haien irri bareetan

agertuko zara: jada mamu.