VLADIMIR HOLAN ETA BEROKUNTZA

Etxetik hogeita hamabi urtez irten gabe

barreiatu zuen Vladimir Holanek

bere poesia

Europan barrena

Malá Stranatik Iurretaraino.

Holan,

Pragako Kampa irlako

bere etxean giltzapetuta,

irla bateko irla bihurturik,

utopiaz etsirik,

goiko pisuko bizilagun

Jan Werich idazle handi

baina atzerrian ezezagunarekin

berokuntza dela eta ez dela

beti haserre,

beti uzkur.

Holan nor izan ote zen ez badakizu,

irakurle maitea,

ez arduratu,

teknologia eskura baituzu

gabezia hori konpontzeko.

Poemon maila intelektuala igo nahian

ekarri dut Holan jauna hona,

baina ez dut erremediorik:

bere poesiaz jardun beharrean,

bere poemaren bat

nahita edo nahi gabe

plagiatu ordez,

Werichekin berokuntzagatik

izan ohi zituen liskarrak aipatu ditut

ustezko poema honetan.

Esker ona heldu zait

haren bigarren hilobitik.