KIOSKOKO SALTZAILEAREN BEGIRADA

Andreak jauzi egin zuen

zaintza bereziko eroetxera

zeraman furgoitik

zaindariei ostiko bana jo

eta kolpe batez atea irekita.

Leher edo zapart

hurbildu kiosko batera

eta egunkari bat erosi zuen

kioskoko saltzailearen begi zurtuei

erreparatu gabe.

Berehala

etorri ziren

telebistetako unitate ibiltariak

eta irrati-esatariak

jazotakoaren berri ematera.

Bertaratu ziren

makina bat jubilatu,

obren hesietan besoa bermaturik egoteaz asperturik,

andre hura txalotzera.

Azaldu zen estatuburua ere,

dela errege, dela presidente,

andrea ohoratzeko hitzaldi bat murduskatzera.

Esan gabe doa

egun hartako editoriala

eskaini ziola gertatutakoari

New York Times egunkari digitalak.