Keinu konplizeak
Keinu konplizeak
2018, poesia
88 orrialde
978-84-17051-12-9
azaleko irudia: Kepa Gonzalez
egilearen argazkia: Dani Blanco
Karlos Cid Abasolo
1963, Madril
 
 

 

BI KANTAUTORE

 

 

Bi kantautore

altzairuzko oihalaren beste aldean,

biak ospetsu,

biak maitatuak.

 

Batak

(demagun 

H letrarekin

hasten dela

bere deitura)

Mendebalera egin zuen ihesi

1978an.

 

Bestea

(demagun

N letrarekin

hasten dela

bere abizena)

herrian geratu.

 

Urratu zen oihala,

itzuli zen iheslaria,

herritarrek

aireportuan bertan egin zioten

merezitako ongietorria.

 

Ordutik

hogei urte baino gehiago

igaro dira.

N-ren kontzertuak

jendez mukuru beti,

telebistan agertu ohi da,

beti irribarretsu,

denek maite dute,

lehen adina edo gehiago.

 

H, ordea,

berak ekoitzitako CDak

bere kontzertu ikuslez urrien ostean

saltzetik bizi da,

ozta-ozta.

 

Atera berri du kanta bat

Salataria deritzona

zeinean egia biribilak pilatzen diren

txondor erraldoi bat osatuz.