COMBOIOS DE PORTUGAL (I)

Sintratik Lisboara doan trenean

mozkorrak irri dagi mintzo zaigularik

(ezer gutxi dut ulertzen)

aurpegi kamuts, intelektual,

serio, berdintsu

garen besteoi.

Erruki dugu.

Gaixoa, dio berekiko

nire ezkerrean bere eserlekuaz

eta nirearen erdiaz jabetu den

andre permanentedunak.

Irri eta irri dagi (mozkorrak),

eta kantari dabil,

eta badu txartela.

Mozkorrek

beti izaten dute txartela.