GEZURRAK ERAIKITZEN

Malkarrezko distantzietan,

mugen dardaran zehar,

maskara.

Soinuak bizirik atera ziren hegazkin-istriputik

(aditzera eman denez),

gaubeila amaigabe haietan

ganbara magikoan

zodiakoak eta hitz frankotiratzaileak gogoan,

biharamunean ez-ulertuak sortuz.

Keinu konplizeak, urte askotarako eta abar.

Keinuari guk irribarre.

Alferrik zodiakoak eta hitzak alegatzea,

harresirik gabeko aitormenak,

lekuko saldoen aurrean soilik eraikitako besarkada.

Iruzurra kimatu egin zen.

Maskara,

aurpegiaz ez bestelakoa.

Tramoiazko amodioa.