Gauez muzinduta

Hannah eta Herman Lenzentzat

Loreen ezpainak

muzinduta gauez,

pinuen enborrak

gurutzatuta eta bilduta,

goroldioa urdinduta, harria dardarka,

ipar beleak itzarririk

hormagunearen gaineko hegaldi etengabe baterako:

Hona hemen harrapatu genituenek

atseden hartzen duten eskualdea:

Ez dute ordurik izendatuko,

ez dute malutarik zenbatuko,

ezta ura ezpondaraino jarraituko ere.

Bereziturik daude munduan,

bakoitza bere gauetik gertu,

bakoitza bere heriotzatik gertu,

kopetilun, buru-has, antzigartuta

hurbilarekin eta urrunarekin.

Beren jatorriari lotutako zorra kitatzen dute,

udak bezala arrazoirik gabe irauten duen

hitz batez kitatzen dute.

Hitz bat — badakizu:

gorpu bat.

Garbi dezagun,

orraz dezagun,

jar dezagun haren begia

zerurantz begira.