AMONA MARIRI

            nik ere maite ditut txoriak, amona,

            baina kaioletatik urrun,

            aske zeru zabalean

Sentitzen zaitut

bi zilbor hesteen arteko korapilo luzean.

Sentitzen zaitut urrunean nahiz hurbilean.

Oroitzen zaitut

tigre irudidun manta marroiaz estalirik

etzanda izarren babespean.

Oroitzen zaitut

negu hotzean izerdi patsetan bizikleta gorrian

egunsenti bezperako karriketan.

Begirada hunkibera begi zimurretan,

esperientziaren altxorra ahots kordetan.

Sentitzen zaitut

nire masailetan itsatsitako

zure ezpainetako karmin arrastoetan.

Begirada urdurietan,

esku nekaezinetan,

lan gogorrenetan,

une latzetan estututako ukabiletan.

Ulertzen zaitut hizkuntza arrotzean,

hobeki etxeko hitz goxoetan.

Irudikatzen zaitut

bihotz erraldoi baten gisa.

Maite zaitut, aske.

Txoriak jostari dabiltza

leihoaz bestaldean.