ZURE AZALEAN IGERI

Musukatu nahi ditut

zigarroek horitutako

zure hortz bihurriak.

Miaztu zure ezpain azpiak,

marrubiak bezain gorriak.

Iritsi nahi dut besarkadaz

zure gerri zabalera.

Zimur eta bihurguneetan barna

nahi zaitut gozatu,

ardo on baten gisa

tragoz trago dastatu.

Urperatu nahi dut ahoa

zure haragi samurrean,

kosk egin ipurmasailean.

Besapeko ileak laztanduz

nahi zaitut behatu.

Zure izerdi usainak

sorgintzen nauela

belarrira xuxurlatu,

duda oro ahoz aho xukatu.

Nire begietara zein ederra zaren

lau haizetara oihukatu.

Edertasuna klixe zorrotzegiz

patentatu duen jendarte honi

zure azalean igeri eginez

nahi diot aurrea hartu.