PAISAIA MOREAK AMETS

Labanda usaineko paisaietan

oroitzen zaituztet, osasuntsu,

gure herrian sustraituta,

izara koloretsu baten gisara.

Zuen pausoek

nire bihotz taupadetan

egiten dute oihartzun:

doinu bortitz lasaia.

Larre more zabalotan

suma dezaket gure sua,

erein dugun haziaren garra.

Labandaren esentzian

borrokaren usaina.

Paisaia moreak amets,

saretzen ari gara oihala.

Muga-hesirik gabeko sentimenduan

izara beraren epelean

eskuz esku josten oraina.