GELA BAT NORBERARENA

gorrotoa tatuatuta daramat begi ninietan

ahanzturan galduta daude begirada samurrak

ito egiten nau errepresioaren reality show honek

aztoratu behatxulo eta klakaden neurrigabekeriak

triku itxurako katu amorratuak bezala

ezin diet beste era batera so egin uniformeei

gorrotoa ez da konpainia ona ezleku honetan

ahanztura ez da solaskide aproposa bahitegian

eraikiko dut gela propio bat zulo honen barruan

laztan nazazuen begiradez eta irribarreez

malkoz itsasoratuko dut gorrotoa eta

samurtasunari egingo diot txokoa

metro karratua

gutxienez