ALEZ ALE

Bazoazte

alez ale,

bazoazte

nire barrenetik

ihesi, urrun.

Petaloz petalo

biluzten ari naiz

udan ere

hotz sentitzeraino.

Bizitzaren bidezidorretan

sarriegi dabilkit

Mateo txistuka.

Baina ez dut nahi

putzaldi gehiago,

nire inguruan

behar zaituztet-eta,

azaleko ileak legez

ni babesten.

Lili honen

zurtoinak adierazten du

esan nahi dizuedan guztia,

horrelaxe sentitzen bainaiz:

maitasun dosi txikiak

nigandik eten eta

apurka-apurka

aldenduko balira bezala.