GOI TENTSIOKO KABLEETAN - 1

Malabaristen moduan

oreka topatu nahian

goi tentsioko kableetan

dantzari gabiltzan txoriak gara.

Bihotza kiskaltzeraino maite ditugun

lagunen indarraz egiten dugu egunerokoan aurrera,

ez baita borrokarako grina zaharrik

borroka grina oraina denean.

Elkarren irribarreen besarkadetan

urtzen garen izozkiak gara,

elkarren indarren pausaleku,

tentsioak askatzeko elkarren sorbalda.

Zer gara ba gu:

hegan aske egin nahi duten txori errariak,

hegoak astinduz haize bolada traketsak

eragozten dituzten arrano biziak,

hegoak zabalduz herria besarkatzea

amets egiten duten ameslariak.

Eta hori lortu bitartean

ezinbestean jarraituko dugu

goi tentsioko kableetan dantzan,

ez baita borrokarako grina zaharrik

borroka grina eta pipermina

gu geu garenean.