nola kendu lokatza, hain irmoki itsatsitako

hauts geruza? nola ezabatu

orbain zailak, antzinakoak, ezabaezinak?

nola garbitu estaltzen zaituen gaiztakeria guztia?

(ostegun arrastia dirudi,

ilbete argia, lainoa belardian

entzuten al duzu egurrezko palen kolpekada erritmikoa

urmael, erreka, laku guztietan?

nor ote dago arropa garbitzen

hain berandu? estal itzazu belarriak)

tolestu eta berriz ere tolestu egiten dut lihozko atorra

garbia, zuria, baina ez dakit

ezin dut igarri

nola zuritu, nola araztu zu

ene arima