Ilargiaren lorratza

         1

urre hautsez zipriztindua, ilun, oso ilun,

une batez pausatu da atseden hartzeko

ez duzu aurkitzen nondik irtengo zinatekeen

hegan korridore estu itsutik

tximeleta hau

bueltatu den arima bat ote da?

hondarrez estalitako eskaileran

jaberik gabeko basa-katuak, buru gainean

kar-kar-kar (ez dakizu ez ote diren

aurretik deskribatutako bele jangarri berberak)

saguzar bat errezelen tolesturetan

buruz behera zintzilik

mugitu gabe dago lo sakonean

duela egun batzuetatik

ze mundutako mezularia zara?

         2

ia lokarturik zaudela, norbait

sentitu duzu logelan

sagu bat da

mahai azpitik lasterka

ezin da ikusi

urrats bakoitzean

oroitzapenak datoz: hemen

huntaz eta hartaz hitz egiten genuen, oinez gindoazen

bidexka hauetatik, izarrak erortzen ziren

eskukadaka

ahoskatutako zenbat “gabon”

hilen itzalek

zurekin segitzen dute bizitzen

begira:

ilargiaren lorratza dirdirka ari da

ur azalean