hain denbora luzez nabil etxe honen bila

arimako begiekin hauteman nahi dudala

laino artetik

eta ezin topatu

txilar landak, eta txilar gehiago, espazio

mugagabe hutsak,

haizea hezurretan sartzen da

baso apalak zeharkatuz

izan behar luke etxe bat

harri grisekoa, teila

griseko teilatuarekin, etxe txiro

eta hotza, putzuko ura ez da

oraindik osasungarria hemen

hilerri txiroaren hiru aldeek

inguratzen dute, leihotik

iluntasunean dirdirka

argi bat ikus daiteke amaren hilobian

sua tximinian

paseo luzeen ostean

atzamar sorgortuak

hatsarekin

berotzen saiatzen zara

hiru Brontë ahizpak

bizi izan diren etxea

Charlotte, Emily, Anne

eta beraien aita klerikoa

herri txiki bateko parrokia

konpondu gabeko errepide kaskarrak

iluntzen ari du, motor baten

burrunba entzuten duzu

dagoeneko heldu izan bazina legez, baina ez,

ez da hemen, ez duzu harengana

iristea inoiz lortuko itxuraz