BASALOREAK

hesi elektrikoek isolatua

besarkada bakarrera zauzkat

desio partekatua aski balitz bezala

negua bihurtzeko uda:

uki nazazu labarrak itsasoa

jo ohi duen iragazkortasunaz

garai basatiko kume

itzal hari baten hegian nago,

gutxiren ongizateak elikatzen du

aunitzen ondoeza,

hilen zain irekietan luberritzen da

ekonomia askea

zuhaitz berdeek paldoan sartuta

dakarte ortzia

edozein urtebetetze jai

itzungi guraz putz aldi batean:

arta garaiz iritsi ez zaienak

mende luzez izan bitez maiteak

ez ahaztu, meriturik gabe

igurtzi nau berriz zure amodioak

eta adiskidez edo

planetaz aldatzen bazara

noizbehinka bederen

fereka nazazu zure ametsen orbelaz

gordea dizut oraindik

xeraren patrikako edizio bat