SARBIDEAK

neke egin zaio gelan sartzea gaur eguzkiari

eta tarteka makinek eskaintzen didaten

espazioan oskoldu izaten naiz:

garbigailua lisaburdina sakelakoa

eguneroko mekanika da norbere baitatik irten

eta besterenean ostera egitea:

birusaren udalehen isiotu berria

xeraz inguratu zait iraganaren bengala artean,

etxekoen portaerak eta ebazten

zailak zaizkidan bestelako ekuazioek

edozein txokotan galkatzen didate gogoa

iluna hasi da barrunbeak hartzen,

hiru pertsona ez beste munduko biztanle guztiak

gure etxeko hegalpetik kanpo dira:

zorabioa eragiten didan pentsamendua da

gobernuen diru kontuak edo

baso borealen aurkintza aurresentitzea bezala

bakun metagarri aldakor gara,

barrutik irteteko teknikak hobetu nahi ditut

hiru laguneko gizateria baten

lorpenek hertsaturik

tristuran erroiztuta ez jotzeko behea

eguzkia joan da bere amagana eta

lo aurreko unean hozbero aldaketak eragin

malenkonia eite baten landura petik

saltoki bateko izoztuen saila loratu zait

itzalitako mundu bati begira

joko hau zertan den berri ikasi nahi du bihotzak,

eta emozioen ordena baten galdez hor datoz atzera

sakelakoa garbigailua lisaburdina