Landura
Landura
2022, poesia
96 orrialde
978-84-17051-92-1
Azaleko irudia: Xabier Gantzarain
Jose Luis Otamendi
1959, Azpeitia
 
2019, poesia
2014, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

GAUZETAN

 

 

maitagarri zaizkit sukaldeko

guraize begi-handiak,

zauritu zintzaketenean aldamenera egin

eta hankak estu-estu muturrez behera

jausi direlako zoru gainera

 

maite dut egongelako alfonbra,

xeraz laxatzen baititu zuntzak

zanpatzen duzunean,

hartu dituen oinez dakienaren taxuz

bizi gabeko bizitzak gomutatuz bezala

 

maitagarri zaizkit leihoan

barraskiloek zapuztutako oskolak,

belarri ondora ekarrita

ozeanoen dolu-arnasaz batera

zure bihotzaren zortziko hautsia

entzuten dudanean

 

maite dut hainbeste gauza:

ukitzen zaituen arropa

ile adatsaz ehuntzen duzun airea,

zulatu ezinik pentsamenduak

euri tanten osteak

 

eta ez dakit azaltzen zergatirik:

gauzek, gogoaz libre

beste aldi batzuetara

aisa garraiatzen nautelako apika

 

maite ditut gauzak,

odolaren pilpirarik gabe

material eta egituren arteko

harreman zailen gose

oraino aldika nahasten ditudalako

bulkada etilikoak etikaz

 

agian gu galdutakoan

gauzak geratuko direlako lekuko,

eta horren bekaitz eztia da

maitasun honen harien peskizan

astiro jaten nauena

 

maitagarri zaizkit gauzak:

zureak nireak edozeinenak,

zabaltzen dituztelako

gupidarako bezala adimendurako xendak,

esaten dakizkitelako nare

kontu gordeak