IKUSEZIN BIHURTU

atzeraka leitu nahi ditut albisteak poemak,

uste dut irakurtzeko eran

neugan dagoela gauza askoren

jatorri gordea

naizen-naizenaren zolan behar du

baina alderantzira jarrita,

badira eta

bestela ireki ezin diren ulerpideak

bestelako ordena

bestelako arnasa hartzeko eskolak

zeruak lurrarekin aspaldi egin zuen bat

dena dago alderantziz orain,

orduak atzeraka doaz

eta bizkarrez nabil

egunen muina iritsi nahian

uste dut ni ere banaizela

askazi hartakoa,

jainko guztien aitak bortxatu eta

memoria gabeko haurrez

erditu zen ama haren segida

dena dator alderantzira,

geroa galdu egin zen

eta iragana da heltzear,

goserik ez zuen mundu batera

gosea ekarri dugu

eta mehatxagarri jotzen da

ezeren jabe ez izatea

atzeraka irakurri nahi ditut albisteak,

hala hastapenera heldu orduko

dena amaituko da bai,

baina beste molde batez

atzeraka leitzen ikasi nahi dut,

eta poesia benetan

gaitz autoimmunea bada

jabe izateari utzi

arrisku hutsa da ezeren jabe ez izatea

arrisku hutsa da inoren jabe ez izatea