AURPEGIAK

izukaitz ageri gara

zaparrada epelaren pean,

atertu gabe jaiotzen ari da jendea

baina luze-iritziz nago,

astebete daramat

maiatzaren esperoan

bart ostera bikoitza egin nuen

etxeko geletan,

beti aurkitzen da zerbait berria:

hauts maluten eraketa

argiaren geometria

taupaden kontrapasa

ezin dut etsi banketxeen

publizitate kanpainekin

—ondo-bizien lerroan paratzen gaitu denok—

gero traizioen marra ilunantzak

karranpak eragiten dizkit

artzain elektrikoen antzera

albistegiek mustu dute

krisiaren hurrengo fasearen atalasea,

harriak hondarra zakarrak

baliatuko al ditugu

arrangura gabe

horma artean itotzeko itsustutako aldarriak

zer galdu dugun ez dakit:

gorputz baten beroa

diru piltzar batzuk

agurren ile xerloak

—ez dut laketu nahi

bizi nahi ez dudan bizitza batean—

oso garestia izan behar du

iraultza batek,

horregatik tematzen gara

betiro besterenean,

hala, erratuz gero

ondorioak ez dira hain dramatikoak