LASTO EURIA

bizigarritasun arazoak sukaldean:

urratsak emateko eragozgarri dira

metafora hondarrak arasetan

adjektiboak zutika

garbigailuko arropa artean

distraitzen naiz

zorionaren arkeometria frogen bila

etxekoen kaltetan

mikrouhinak eskaintzen didan

minutu bakoitzari

galdatzen dizkiot beste bost

eta paratzen ditut berrogeialdian

ukitu ditudan ogi kozkorrak

lisaburdina emozioak

zenbatetan bota ote diet

erasiaka albistegiei

ez dira pasako

herriak ez du barkatuko

ondoren baina sakelakoan

dar-dar bat da nahikoa

lurruntzeko nire oldarra

gero eta hobeto ulertzen dut

ohetik jalgitzean

zergatik besarkatzen duzun

han uzten dudan itzala

—irriz, ahoan diamanteak oretzen

genituenean bezala—

egun makinen hilezkortasunak

xarmaturik nauka poxi bat