[Lur gorri lur beltz]

Lur gorri lur beltz,

itsasotik hator,

erre berdetik,

antzinako hitzak

eta odolezko akidura

eta geranioak harri artean

dauden lekutik,

ez dakin zenbat hitz eta akidura

dakarkinan itsasotik,

oroitzapen bat bezain aberats,

hondamenezko zelaiaren antzera,

hi, hitz gogor eta zinez gozo,

odolez antzinako

begietan bildurik;

gazte, sasoiko oroitzapena den

fruituaren gisan,

hire arnasak atseden hartzen din

abuztuko zerupean,

hire soaren olibek

itsasoa gozotzen diten,

eta hi bizi eta berbizi haiz

harritu gabe, lurra bezain

zinezko, lurra bezain

ilun, urtaroen eta ametsen

errota, ilargitan azaltzen dena,

antzinako, hire amaren

eskuen antzera,

sutontziaren hondoa.