DIMENTSIO PARALELOAK (III)

ohe ondoko mahaian argi txiki bat piztuta

diru-zorroa eraztuna autoko giltza

ilunak bildua du hoteleko gela

bizkarrez hartzen ditu kamerak

ile xerloak oheburukoan korapilaturiko huntz

arropak lurrean orbel

iraganaz zerbait xuxurlatu bitartean

orgasmo osteko barealdia antzezten dute

irribarre nasaia eskatuko zieten

bietako batek ordulariari begiratu dio

keinu mingots bat eta maindirepetik atera da

jantzi aurretik botoiari sakatu

gora egin dute pertsianek

argi izpiak gela barrura

kaleko eszenak hartu du pantaila

ondoko espaloia mukuru

auto batzuk bigarren lerroan argi laranjak piztuta

lantokietatik jendea irteten etxera itzultzeko ordua

eguna amaitzen hastera doa