AZKEN JELAK

uste dut urte hartan izan zela

oraindik ixteke elkarteak

mahaian hamar lagun

eta pantailan

antartikatik inoiz etendako izozmendirik handiena

bisaietan seinaleren bat topatzen saiatu

izango zuen norbaitek azalpenik

izan behar zen gure artean argi printzarik

baina sorbaldak altxatu

eta begiak makurtu genizkion elkarri

ez genekien nola iritsi ginen haraino

eta larriagoa

inork ez zuen ideiarik handik nola atera

azkar edan genituen edalontzietakoak

azken jelak urtu aurretik

gero mugikorrak eskuetara

laster iristen hasiko ziren

ustekabeko deien zain jarri ginen