TANTAK

uda hasiera hor nonbait deitzeari utzi zenionean

zaratak entzuten hasi nintzen

zabor bilketako kamioia

banatzaileak bizilagunei tinbre joka

ezin zenidala idatzi esan zenidan

baina badakit nola lehertzen diren xaboi ponpak airean

ikusia naiz gazteluak amiltzen marea igotzean

sakelakoan dantzan atzamarrak behin-birritan alferrik

hondartzako kantinetan izotz-edariak bezala

irabiatzen du denbora sukaldeko hozkailuaren motorrak

sargori dago

minutuak kanilan behera tantaka