TRUKEA

egina dago tratua

lotu dute lotu beharrekoa gure abokatuek

iluntzean trukatuko ditugu bahituak

herria ebakitzen duen zubian

bi udaltzain kalean gora eta behera

helikoptero batek glamourra emango lioke eszenari

udazkeneko hostoak trabatu zaizkit eztarrian

atzera egitekotan egon naiz

barka gaur ez naiz ongi esnatu sukarretan nago

baina patrikan dakartzat entregatzekoak

seinalearen zain nago ibaiaren ertz batean

hamahiru kanpai hots gauerdian

lokarriak askatu dizkiet zure mamuei

hegan doaz globoak balira bezala

beste aldetik hurbiltzen ikusi ditut

antzinako animalia desagertuak

urtzear den azken glaziarraren mihia

hemen naukazue ahoa zabal

labar txiki bat naiz