ESAN GABEKOAK

gaixo zaudela esan didazu

sua eman dioten zaborrontziaren alboan

plastiko errearen usainak bilduta

baldar besarkatu dugu elkar

axolagabe igarotzen da jendea

geltoki inguruan beharrezkoa den

berandu heltzearen beldurrak

daramatza haien gorputzak

ez dago oroitzapenetarako astirik

lau hitz-erdi elkarri aurpegira esanda

bagoaz nor bere etxera

sekula esan gabekoak lagun