DÎNER CHEZ ANTOINE

hiriburuko apartamentu bat

gaizki egositako makarroiak

tomate hotza gazta txarra

lau plater ezberdinetan banaturik

ohean eserita dago bat

aulki zaharretan gainontzekoak

hozkailu txikiegitik

urdaiazpikoa atera du norbaitek

zapore artifizialeko ardo gorri

botilak ikus daitezke esperoan

haiek ere apurka hozten

soiréerako prestatzen

janaria zintzurretik behera

mekanikoki behartuz

garagardoa edaten ari dira

ez dute musikarik jarri

liburu bat darabilte ahotan

etxeko gela guztiak bakarrean

biltzen dituen hiriburuko

apartamentu batean