ERAKUSLEIHOA

elkarren ondoan eserita

abisala da bion arteko amildegia

arnasa har dezakezu

eta edaten jarraitzen dut

elkarri begira

ulertzen ez dudan hizkuntza batean

hitz egin didazu

elkarrekin biziko ez dugun

garai urrunaz

elkarrekin goaz

eskaileretan gora

korrika ihesean

edaten jarraitzen duzu eta

arnasa har dezaket

lurrean botata aurkitu dugun gaztea

lepoan hartuta zeharkatu dugu hiria

berpiztu dezaten etzan dugu anbulantzian

mapa eta guzti azaldu dizut

ez naizela hemengoa

isiltzeko esan didazu

kontzertua hastera doa

handik hona zatozte

arnasa hartzen abesten

edaten eman ditugu orduak

euritik babesteko aroztegi baten

erakusleihoaren aterpean

hemendik goitik

hain txiki ikusten da gainontzekoa

non handiagoa den senti daitekeen poza

proportzionalki garestiagoa kafea

munduaren beste punta ere

kabitzen da nire apetan

bizitza hori konta dezakeen ahotsa

alkoholetan bustita

lauso ikusten da goiza