SUKALDEA

saguak dabiltza gauez

txistu doinuak egunez

egunaren eta gauaren artean

gurea da sukaldea

elkar ikusi gabe ahal bada

txistulariak lo eta saguak gordeta

geure janaria geure armairutik atera

geure bazkaria egin eta jan ostean

geure geletara itzultzen gara

bi egunetan bertatik ez ateratzeko

okasioetarako elkartzen gara

arbel zurian iragarritako hitzorduetan

derrigorrean besapean botila batekin

batzuk arduratzen dira oilasko erreaz

gainontzekoak jateaz eta edateaz

mahai handia birtualki zatikatzen da orduan

ukrainar vodka finaren inguruan batzuk

pastis eta garagardo artean besteak

euskaldunak frantsesez eta frantsesdunak isilik

mahaia zeharkatzen du begirada batek

noizbehinka mugikorren pantailak itzaltzen dira

zikintzearen eta garbitzearen

arteko dialektikan

aurrera doa erlojua

diskotekara abiatzeko tenorea

heldu bitartean

zain egotea baino gehiago da

orduak zentzuz hustea