PASAI DONIBANERA BIDEAN

etsiak hartuta metalezko jarlekuan

bakarrik nago Ategorrietako geralekuan

denbora baino zerbait gehiago behar da

inoren gogotik ezer erauzteko

belarria burdin hotzaren gainean jarrita

egiaz trena ote datorren entzuteko

milioika hartxintxarrez egindako

hondartza luzean etzan eta itxaron

aldirietako trena destino Irun berehala iritsiko da

destinoa trena hartzea edo etzanda geratzea

erabakitzea bezain sinplea balitz zentzurik ba ote luke

etxetik ateratzeko indarrik egiteak

bigarrenez ari naiz Egunsentia irakurtzen

Kanadan hiri batek su hartu duela diote

eguzkitan urtzen zaizkit etorkizunak

mina ez da betikoa baina mina da izan

gezurra esan diot zigarro bat eskatu didanari

paketea ia osorik daukat oraindik poltsikoan

Jaizkibel bizkarrean garagardo hotza

tabernako mahaitxoan itsasadarrarekin batera edateko