FREE MONEY

Horrela zegoen gauza: erre usaina sukaldetik,

Zaborra bazter guztietan, zarata ezezagun eta

Gogaikarri bat. Kim Gordonekin pentsatzen zuen

Emakume askok, beren joera sexualez galdetzeko

Modu bat. Planoak urduritasunez higitzen ziren

Batez ere abenida zabalenetatik pasatzen zirenean.

Dream It! esaten zuen neska gazte baten elastiko

Beltzak. Txakur bi ikusi zituen elkarri dorpeki

Haginka Quincy Street inguruko bazter ezkutu

Batean, baina amore eman zuen etsipenez. «Zer

Ezkutatzen dute hitzek?» xuxurlatu zuen. Horrela,

Argi berezia izan zuten egun haiek, izatez ez zen ke

Ilunaren eraginik sumatzen ia eta jouissance gakorik

Gabe idazten hasi zen jendea. Ezkontzak, dibortzioak,

Manifestazio jendetsuak, inaugurazioak. «Poeten

Kontra borrokatzeko prest gaude» esan zuen K-k,

Aurrez egindako galderari erantzunez bezala. Orain,

Muga guztiak ezabatu zaizkigula, heriotzaz

Mintzatzeko gogorik ez dugula, oroitzapenak egia

Ote diren pentsatzen ari naiz. Agian berak ere izan du

Inoiz iraganarekiko mesfidantza eta beste zenbait

Ardura alferrikako. Bost urteko mutiko batek ezin

Zuen objektu zartatu horiek guztiek zer esan nahi

Zuten asmatu: Zer jartzen du hor? Eguzkiak erretako

Galtza gorriak, olanazko zapatila urdinak. Beste

Emakume bat kexu zen edozer gauzarengatik. Bizitzak

Aitzinera egin zuen etengabe, baina; zer egin

Zezakeen? Ikara sentituko du gaur egun zergatik ote

Den jakin gabe. Hesiek garai modernoen harridura

Sorrarazten dute, konfiantza handiegiz bizi dira.