SANT GERVASIKO ELIZA

Beltzaren barne sartzen da, batzuk esaten dute,

Unibertso osoa nahiz eta esango nukeen John ez zela

Iritzi berekoa. Kontuan izan aterkia irekitzen

Zuenean esaten zuen esaldi hura, edo erosketetan

Izaten zituen zalantza konponezinak. Beroa egiten du

Gauden garairako. «Agian ez dago jada soluziorik»

Aipatu dit lagunak, bigarrenean ulertu diot, eta Sant

Gervasiko elizako kanpaiek laugarrenez jo

Dutenerako iritsi naiz Verdi kalera.

Etxeren bateko itxaropena alde egiten ari da

Hoditeriatik urak uholdeak gertatzen direnean egiten

Duen antzera. Eta musika ere entzuten ahal da,

Lucinda. Inork ez du oso garbi bere egitekoa arte

Sisteman, edo instituzioan (!). Eta gauzak ziur

Dauzkatenak izan daiteke: segurtasun falta beren

Buruetan; umetako trauma infantil bat, zeina ez den

Agerian jarri, subjektuaren (!) kalterako, noski;

Harrokeria justifikatu gabea; interesak, gisa

Guztietakoak.

Horregatik pentsa dezaket Johnen iritzia ez dela

Halakoa edo suposatu, arrazoi indartsu bat dagoela

Atzean, ez dakit, eman dezagun, giza duintasuna

Kolokan jartzen duen zerbait. Fidatzeko moduko

Morroia baitzen (ez dut esango garai zaharretako

Horietako bat zenik, eszeptikoa naiz filosofikoki, eta

Filosofiarekiko), Gasteizen ikusi nuen gau batez,

Harriturik. Isiltasuna desgrazia bat da gizaki

Estandarrentzat, guretzat esan nahi dut, heldutasuna

Aurrezki kutxara kexuka, sumindurik, joanda lortzen

Dela pentsatzen dugunontzat. «Udaletxera joatea

Bizigarritasun baimenak direla medio» gogorarazi du

Inondik ere inozoa ez den irribarre bat aurpegian.

Ordaindu eta irten egin naiz, berandutu egin da-eta.

Bero da oraindik eta oinez egin dut bidea. Autobusa

Orain hartzea eromena da, trafiko izugarria egoten

Da ordu hauetan, autobusak ez du merezi hiri

Honetan. Eta linea honetako metroko trenak

Zaharrak izaten dira, ez dute aire giroturik, izerdi

Patsetan bukatzen duzu, jendez lepo, eta ez zait

Komeni piura horiekin aurkeztea han. Aurten beltza

Nagusitzen ari da berriz ere, eta soziologo ausartenek

Kontserbadoreen garaipena aurreikusten dute

Hauteskundeetan. Zure obrek ez lukete arrakastarik

Izango John, inork ez lituzke aintzat hartuko, beste

Behin etorriko lirateke italiar horien gisakoak,

Gogoratzen John? Azkenean, ez duzu gehiegi galdu.

Hemendik ez da itsasoa ikusten baina eguzkia berdin-

Berdin ezkutatzen da antena mordoen eta eraikuntza

Irregularren atzealdean.