BERDEZKO ALDIRIAK

Hizkuntza-joko batean murgilduta alferrikako neke

Ugari aurrezten dira. Eta jarioak elkargurutzatzen

Kiribilduta maiz; batzuk hazi egiten dira, beste

Zenbait, behinola nagusi izandakoak (edo betidanik

Galtzaile izandakoak) txikitu egiten dira, ahitzeraino.

Jolas bat baino gehiago da. Mundua galdu egin da

Baina semaforoa noiz berdatuko itxoiten dut.

Jendetzak ostu egiten du argia, leku eza, akidura:

Piercing & Body Painting. Kantatzen dihardute

Atzerritar batzuek «Bésame, bésame mucho, como si

Fuera esta noche la última vez», ez dira jabetzen

Talaien balioaz (batez ere euren egoeran). Hau da,

Ilunpetan, biluzik, bakardadean. Nik, azidoak modaz

Pasa ez direla aldarrikatu nahi dut, plaza hura

Isuriaren bestaldean egonagatik. Maite ditut, Marisa,

Andy, Joanna, D. Prest nago desengainuetarako,

Larrua gogortu zitzaidan iparraldeko haizeen erruz.

Beltz batek bisera batekin estaltzen du bere aurpegia.

Beste tipo bat ailegatu da. Kaleak halako manera

Dute, hemen ezin da sobera egin egiaren alde,

Ez zintuzkete serio hartuko. Barrendu nintzen

Hizkuntza-joko batean eta ez nuen topatu deus han:

Mundua(k), objektuak, gauzak, jainkoak, egia.

«Teilatu honetatik nola atera argazki berri bat?»

Galdetu didazu, eta nik ironikoki interpretatu behar

Izan dut. Nola bestela? Lerro zoro hauek ezin dira

Ekidin dagoeneko, sareak ezinbestean atzemango

Zaitu. Ondo bidean, andere bat hunkitu ahalko

Duzu udaberriko egun ezinezko (hala dirudi) batean.

Eta gero, sinatu eta data jarriko duzu bolaluma

Berde batez. Gertaldi agortezinak etorriko zaizkizu

Burura ausaz, baina zuhurrena galdu egingo duzula

Sinestea da. Eta gauza okerragoak badira. Pentsa

Zenbat jende hilko den minbiziak jota eta

Orijinaltasunaren inguruan hausnarketa sakonik

Egin gabe. Ez dira argazkilariak auzune honetan bizi

Izan diren bakarrak. Segurua da zu ikusiko

Zintuztela teilatuan sarritan, pentsakor, enigma anitz

Ebatzi ezinda. Bai, leihoetan paratuko ziren. Orain,

Ordea, oinazeak harrapatu ditu. Elkarren antza

Handia duten bi gauza topatu ditut portalean, eta

Beste bi magrebtar, eta hegoamerikar, eta

Txinatarrak, eta pertsianak, aulkiak, kajak,

Kakalardoak, eta zakurrak, eta bizikletak, eta abar.