ARGAZKIEN DIMENTSIOA

Metalez eginiko erloju hori beti dabil atzeraturik,

argazkiek inguraturik dago eta denbora ezberdinak

eman behar ditu

argazkiei keinu egingo badie.

Inoiz orraziak jausita aurkitzen dut,

norbaitek, arautegia urraturik,

atenporala den iraultza batetik irten eta

matxinaturik, sabotaje ondo neurtua

egin izan balu bezala.

Baina horrela izanik ere, bere politika alienanteak

irauten du betiko lelopean. Tik, tak, tik, tak.

Argazkietan gu gaude aurrera begira,

balizko puntu erakargarriari begira.

Badirudi ez gatozela inondik,

atzeko infernuaren deia entzungo ez bagenu bezala.

Argazkietan, erlojuaren inguruan, umeak daude.

Eta euren txikitasunak denbora osoa irensten du.