Kantoira heldu denean, kontainerren parez pare geratu da kamioia.

      Desioa bera baino erakarpen indar programatu eta errektifikatuagoz gertatu ohi da dena. Kontu handiz, metalezko besoak luzatu eta olde leunez, bere gorputzarrera ekarri du ontzia kamioiak.

      Bustia eta hotza. Sukaldeko leihoko kristalean lehertutako ur tantek are gehiago lubrikatzen dute eszena.

      Samurtasunez altxatzen du kontainerra kamioiak altzairuzko beso sendoekin.

      Bi gorputzen arteko frikzio bustiak sortzen duen zarata laranjaz jantzitako garbitzaileen ahotsekin nahasten da. Klimax moduan defini genezakeen puntu gorenean irauli eta kamioiaren barruan hustu da kontainerra. Kale hartako beste kontainerren hustuketekin batu da. Berriro bere onera etorri, eta leuntasun elektromekanikoz jaitsi, lurrean paratu eta kontu handiz atera ditu beso indartsuak, beste baten bila joateko.

      Harritu egin ninduen norainoko leuntasuna lortu duten ingeniariek beren programazioetan kamioiaren eta kontainerraren arteko uztarketan.

      Gizonetako batek ostikoz jo eta bultzaka baztertu du kontainerra espaloi ertzera.