Poesia kaiera
Poesia kaiera
Emily Dickinson
itzulpena: Angel Erro
2014, poesia
64 orrialde
978-84-92468-60-7
Emily Dickinson
1830-1886
 
 

 

712 (479)

 

Heriotzaren zain ezin nintzenez egon —

Bera adeitsuki gelditu zen nire zain —

Zalgurdiak gu biok ginderamatzan bakarrik —

Gu biok eta Hilezkortasuna.

 

Oso astiro gindoazen —

Berak ez du presaren berri eta nik

Utziak nituen lanak eta plazerak ere,

Haren Jendetasunaren alde —

 

Eskola atzean utzi genuen, non Umeak

Liskartzen ziren — Patioan

Labore kontenplatzaileko soroak ere bai —

Sartzen ari zen Eguzkia atzean utzi genuen —

 

Edo hobeki esan — Eguzkiak utzi gintuen atzean —

Ihintza pausatzen zen, dardarati eta hotz —

Nire Soinekoa Gaza hutsezkoa zen —

Lepoko Zapia — Tul hutsezkoa —

 

Lur sailaren Tontorra zirudien

Etxe baten aurrean gelditu ginen —

Teilatua ozta-ozta ikus zitekeen —

Erlaitza — Lurraren pare —

 

Orduz geroztik — Mendeak igaro dira —

Eta halere laburragoa ematen du

Zaldien buruak Eternitaterantz

Susmatu nituen Eguna baino —