—86—

JOKIN ZAITEGIri

Guatemalara

Paris, 1952-X-25

        Adiskide maite:

        Aspaldi zure gutuna eskuetara zitzaidan bainan zuk agindu Euzko-Gogoa noiz jasoko egon naiz erantzuteko. Ain zuzen bart iritxi zan, eta ez noakizu geiago erantzuna luzatzera.

        Bikain dator banako au, lan ederrez jori. Dakustanez Krutwig-ek zati aundi bat jan digu. Aren lanak lendik ere ezagun nituen berak irakurtzeko emanda. Ez daude gaizki, nere ustez ordea kultur termina erabil-min nabarmenegia erakusten du. Baleike baten batzu ortaratzea, bainan gure adinekoak ez dut uste bere eskolara malgutuko gaitunik. Ortan, kultur-terminak erabiltzen, Mirande askoz ere zuurrago eta antzetsuago ere ari dala esango nizuke. Ortan ere neurria, guzietan bezala, ederren. Ba dira beste idazle zenbait ezagutzen ez ditudanak ere. Nor duzu Kolonbiatik idazten dun ori? Ageri da apaiza dana, bainan ez nuke nor den asmatuko.

        Lanpetuta nabilkizu oso euskeraz idazten: Alderdi dala, Irratia dala, Gernika eta orain gainera Euzko Deyaren orrialdearen ardura bizkarreratu didate Irizar aldendu zitzaigun ezkeroz. Beste zereginik ere badut, jakina. Idazki artu-emanak ere astirik aski jaten dit. Zail egiten zait gure aldizkari maite Euzko-Gogoarako artikulu mardulak idazteko beta arkitzea. Ala ere nundik edo andik bearko du arki. Geienok elertiaz ari gaituzu, eta elerti bideak utzi nai nituke jakintzan saiatzeko. Zer aukera ordea? Lauorritan naukazu ezin asmaturik. Dena den dela, ez zaitut zertan bera utziko. Nere emengo ezagunei ere eska dizkiet zuretzako idaz-lanak. Mirande ari da beste lan sakon bat borobiltzen. Laister eskuetaratuko dit.

        Bukatu dut nere Maita-bidea eta orrail garbietan jarria daukat dagoneko, itz-aurre okitu batez apaindua. Ertzean Ovidiusen neurtitzen zenbakiak jarri dizkiot, laterazko ekoizpena ikusi nai lutekenak obekiago ene itzulpena jarraitu dezan. Arto bero usaia artuko badiozu ere, poliki zamar atera zait itzulpen ori. Baita irureun oar ere idatzi ditut, oro aintzinako Lutelesti eta Mithologiari buruz. Atseden ar beza Maita-bide orrek nere maian. Noiztanka seaska-abestiren bat abestuko diot lokar dezan. Egina beinipein inork ez dit kenduko.

        Iragarri duzun sariketa bete-betekoa. Txanponik aski bilduko al duzu sari ederrak banatzeko. Epea luzea da, lan ederrik antolatzeko naiko. Nik ere zerbait egin gogo nuke, bainan arrotzaldian ezingo nuke deus ere egin Euskal-literaturaren edestiaz Arana eta Azkueren muga bitartekoaz beintzat. Ez libururik, ez aldizkaririk eta burua ere nekatuta. Ortarako Donostia edo Bilbaon bear nuke. Angoek zerbait onik egingo dute eta aien eskuetan utzi bear. Olerkari banitza. Ni ordea Musek inoiz ere ez naute laztandu.

        Labaienek idatzi dit zuen berririk ez duela esanaz. Arkitu omen du Lizardi zanaren Ezkondu ezin zitekean mutilla antzerkia. Zoragarria omen eta zuri igorriko ei dizu E.-G.n argitara dezazun. Munita apaizak Gure mendi ta oianak deritzan liburu bikain bat argitaratu du. Euzko Deyan damakit aren iritxia.

        Izan nintzan Deyrolle-nean. Aurrekoan urrutizkinez itz egin nien eta guzia biali zizutela nik ulertu. Oraingoan bertaratu nai eta Serge ta zure taldeak igorriak zitutela esan zidaten Zugadirena soil zegoela bialtzeko, bainan egun aietan igorriko zutela. Ez dakit nola ibili diran ain astiro. Kontsuladukoak ez susmo-bidean jartzeko egin dutela orrela esan zidaten. Laister iritxiko al dira tramankuluok!.

        Bukatzera noa adiskide. Ene agurrik beroena ar ezazu.