—60—

JOKIN ZAITEGIri

Guatemalara

Paris, 1952-I-10

        Adiskide maite:

        Urtatsarekin gure igaro 24-koa artu nizun, txekearekin batera. Neretzako benetan berri pozgarriak zekarzkin. Bainan nola ontzat artu, adiskide, zure eskeintza ederra. Ez, ez nizuke inola ere dirurik eralgi-azi nai, zere izerdiak goztatzen zaizkizu; ni gabe ere, ba duzu non diruok egokiago erabili. Nerekoikeri aundia litzake, zure diruetaz baliatzea. Biotzak ez dit olakorik laketzen. Alare atseginez zure ondoan lanean ariko nintzake. Ongi dakit, ikastetxe berrirako lankide bearrean arkitzen zerala, baina ni gabe ere, arkituko dituzu lankideok, obeagoak bear bada, zure asmoak aurrera eramateko. Zuk aipatu itxasontzi-etxeetan galdetu dizut zenbatean alda nindeken Guatemalarat. Holand-Amerikan Line-k, orrako osterarik ez duala egiten erantzun dit, ezta Cuba bidez ere. Cie. Trasatlantique-k aldiz, Anvers-tik ateratzen diran ontzietan joan nindekela esan didate. Sei asterik sei astera egiten omen dute ostera, eta ez omen daukate maila bat baizik, eta bera garestia. San José-raino eltzen dira. Dirutan ostera ori, 340-tik 390 dolar kostatzen ei da. Diru andiegia, ene adiskide. Beaz utzi ezazu, arren, bertanbera nere osterakikoa, emen ere lan egin dezakedan ezkero.

        Lurtamuak erosteko biali didazun dirua, larguegia duzu. Oraindik ez dizut diru-txartela aldatu, bainan erosi eta ordaindu ere dizkitzut lurtamuok. Laister jasoko dituzu, egal-ontziz. Ez dut uste orra iristerakoan factura Guatemalako kontsularen baimenez apaindua eskatuko dizutenik, bainan, zer gerta ere, kontsulari aurkeztuko diot eta bear bezela apaindua igorriko dizut. Girard Barriere berak bialiko ditizu lurtamuak.

        Egun artu ditut Deyrolle-n eskutitz eta presupuestoa. Jaiak zirala-ta atzeratu zaigu au. Or ikusiko duzu zer komeni zaizun, eta egoki badiruditzu oro erostea. Garesti dituzu, kimi ta pisi laboratorioak, batik bat, baita giza-azurrutsa ere, eta ez dut uste merkatuko diranik, bada emen goragoraka dioa oro. Idazki ta presupuestoa, zeorrek gorde, nik emen argazki-kopiak ditudalako. Bertzalde, neke aundia egiten du Deyrolle-k egalontziz igortzeko, geienak lantailu astunak diralako. Ontziz, askoz ere merkeago iritxiko zaizkitzu, astiroago bada ere. San José-ra dioan itxasontziak emezortzi egunean ostera egiten dizu, beaz ez da luze. Or ikus dezakezunez bidali-eralgiak egin du presupuestoa.

        Txartela aldatzerakoan, diru sobera oro argi ta garbi igorriko ditizut.

        Benetan zenbaki ederra azkeneko Euzko-Gogoa. Lan aundi bat egingo dizut, urte guziko zenbakiak artuta. Zein aldizkarik eman ote dio euskerari zureak besteko gora ta arrandi. Batxok ere, eta ori erakutsi nai dizut nere idazlan orrekin. Zorion agurrik artu dizut inguruetatik nere euskal-lanak diralata. Ori gero, gure-jendea, arlote xamarra izanik inor zoriontzeko. Mirande bero ari zaigu lanean. Psykhologi gaindikoaz (Metapsikologia-z) izugarrizko lana borobildu dizu. Oraindik bukatzeko dauka, bainan egun auetan emango dizkit azkeneko txatalak. Mamiz, beremodukoa, bear bada, bainan izkeraz ta idazkeraz, jakingarria. Antze bereziaren jabe dugu gazte au, asmo zailenak jazteko. Oriek oro, ta nere bestetxo batzu igorriko dizkitzut. Muñoz Meany zenaren elizkarietan izan nintzan. St. R. Philippe-n eleiz apainean egin ziran. Jente aunitz. Azken otoitzak Mgr. Ronkallik Doipuruaren ordezkaria emen, kanta zizkion. Gu ere lur-jota gelditu gaituzu, benetako adiskide bai genun.

        Urte berri zoriontsuena opa dizut, adiskide, biotzetik. Agindu beti ere euskeraren alde.