—132—

IXAKA LOPEZ MENDIZABALi

Buenos Airesera

Guatemala, 1954-IV-29

        Adiskide maitea,

        Aspaldi zure berriak ukan nituen Rodriguez andereñoaren bitartez. Zoritxarrez ez nuen aipatu andereñoa ikusi aal izan, bainan an utzi zizkidan zure berriak. Asketsiko al didazu ain berandu nere esker-ona agertzera natorkizulako. Orain ni ere, emen arkitzen naiz, zuek bizi zeraten ludi-atalean, Guatemala errialde eder ontan. Zaitegiren ondoan nago, eta euskal-txoko ontantik nere agurra igorri nai izan dizut zuri, euskaltzaleetan bikainen orri. Ar ezazu bada onez, erbestetik erbestera dioakizun agur bero au.

        Nere asmoak, Euzko-Gogoaren baranoan Zaitegi Abarekin lan egin. Atzeratu xamar arkitzen zan gure aldizkaria, bainan orain aurreak artu ditugu. 1952.gko urtea bukatu dugu, eta gure irakurleak beti ere zalantzan aldizkariakiko arkitu ez ditezen, bete-betean 54-grn sartu gera. Irarkolan dauzkagu aurtengo lenengo ta bigarren zenbakiak bereala argitaratzeko. Ala ere nolarebait 53.gko urtea ere beteko dugu zure erritar idazle sonatu baten antzerki eder batekin «Lur-ikara» deritzaiona, nere ustez gurean idatzi diranetan bikainenetarikoa. Engoitik Euzko-Gogoa txintxo txintxo aterako Jainkoak osasun eta laguntza ematekotan.

        Gainera, aldizkariaren inguruan, idaztiak ere argitaratuko ditugu, ori ere gure zabalkundeari euskaldunak erantzuten baldin badiote. Lenengo idaztia Euzko-Gogoaren Idaztiak-etakoa, Tolosan ari dira irartzen eta aurtengo Donibanetarako salgai dagoke. Zaitegi Abaren Bidalien Eginak liburu mardula, 500 orrialdekoa. Oraintxe irakurri dut eta arrituta gelditu naiz idazle azkarrak erakusten duen jakintasunarekin. Ez da inoiz orrelako idazti okiturik euskeraz idatzi. Ikasiko al dute zerbait gure apaiz eta gizon landuek, ots, euskera ere gai dala edozein jakintza mailan erabiltzeko. Dakizunez Euzko-Gogoaren inguruan, euskal-idazle bikainak bildu dira eta orok gerturik daude gure inguruan jo ta ke jarraitzeko. Baita ere gure aldizkariak arrerarik onena ukan du Euskadi barnean. Orain, agiri danez, ango gazte-ikasiak euskerara biurtzen ari zaizkigu. Ez dakizu zer nolako idazki beroak igorri dizkiguten gure lanean aurrera jarraitzeko eskatuz. Eta guk ez ditugu inoiz ere gure euskaldunak bertanbera utziko, ez orixe. Oraingo ontan, politika bideak ertsirik dauden ezkero, euskera beste biderik ez daukagu Euskadiri berean iraun-erazteko. Ez al derizkiozu? Eta ori ezin dezakegu iritxi euskeran, buru-belarri murgildurik baizik, arrotz erdera guztiak astanduz. Guri begira jarri nai ditugu lurbirako euskaldun guztiak gure aberri izkeraren edertasun eta bearkiaz jabetu ditezen. Txorotzat joko gaituzte askotxok, bainan ameslaririk ez genuken une artantxe Euskera ta Euzkadirenak ere bertan egingo lukete.

        Or ere Euskalduna deritzan aldizkako bat sortzera dioaztela esan dit Zaitegi Abak. Badago euskaldunik zuen artean inarrosteko ta xuspertzeko. Guregana ortik inor gutxi etorri zaigu, bear bada gure lana inul ta inozotzat joten dutelako edo. Guk baino zori obea izango al du aipatu aldizkariak Argentinako eremuetan. Bainan guk aurrera jarraituko dugu orain arte baino zintzoago ta gotorkiago. Ez ditugu alperrik galtzen utziko lau urteko neke-lanak, inolako zituak ekarri dituten neke-lanak.

        Nere erritar Iñakirik ikusi bazeneza eman ezazkiozu goraintzi minenak. Pozik zure berriak jakingo nituke baitare gure lanari buruzko zure iritzia. Anartean ar itzatzu adiskide on orrek, nere euskal-agurrik gartsuenak.