—210—

SANTI ONAINDIAri

Larreako Karmelera, Zornotzara

Caracas, 1962-V-23

        Adiskide ona:

        Gaurtxe eskuetaratu dot zure idazki mamitsu eta pozkorra. Ez neban alako barri-on atseginez kuin-kuin etorriko jatanik, ezta urrik emon be. Eztakizu ondo zelan poztu nazen bidean jarri dautsuezan tupustarri guztiak gainditu dituzulako, eskerrak zeure kemen eta adoreari. Bai betoz ordu onean zure aldizkari bikain biak euskera indartu eta bidebatez sinismena sendotuteko. Orra gure aberri doakabearen zimendu tinkoak, biak gaur egunean ain kili-kolo atzerriko aize nazkagarriak dirala-ta. Ez bakarrik atzerriko aizeak, barruko aizeak be, euskotarren betiko ergelkeria dala-ta, ez dira osasuntsuagoak gure aberri giroarentzat. Dana dala guk beintzet, egin daiguzan geure aleginak aipatu zimenduoi gogor baino gogorrago eusteko.

        Eztozue lan makala burutu Aita Linok eta zeuk. Agiri da zuen euskalzaletasuna eztala ilinti motela gar bizia baizik. Eneban usteko Enbeitaren ainbat olerki bildu eikezanik. Irureun, ezta pilo makala. Egia esan, bertsolari gitxi izango dira gure artean ainbeste neurtitz ondu dituenik, eta ain ondo. Nire ustez, Enbeitaren bertsu eta olerki guztiak liburu eder batean argitaratu bear lirake, danak batean aren etorri agortu ezinaren aberastasuna erakutsi dagien. Ondo dakit garestitxua izango dana alako liburu mardula argitaratzea, baina nik, neure aldetik neuriak eta bost alegin egingo dodaz biar dan dirua sortuteko. Oindino ez naz asi eskabide orretan, zure barrien zain nengoelako. Baina bertatik asiko naz naizta ziur egon, itz garratzik asko entzun biarko dodazala. Emengo abertzale ao-andiek, aoa zabaltzeko prest egoten dira beti be, ez ainbestean zizku-aoak zabaltzeko. Baina zabalkunde aundi bat egin bear dot, bizkaitarren artean batez be, ortarako dirua inguratuteko. Eta zer edo zer lortuko dogu. Bitartean, zuek bildu egizuez eta garbitan ezarri olerkiok. Esan biarrik ez, zure itzaurrea liburu orren apaingarririk bikainena izango dala. Ia ba, Aita Onaindia, goraldu dagigun geure Urretxindorra ainbat olerki eta bertso eder esan zituen urretxindorra. Aberriak eskerrik onenak agertuko dauskuz egunen batean.

        Barriro be bakardade soilenean gelditu naz emen Caracasen. Aurre barru aldera joan jaku bizitzari arpegi-emon biarrak bultzatuta. Luzaroan egon da lan barik, eta lan barri bat eskeini dautse, eta erdi-menturan Guaianako zelai zabal eta urrunetara joan jaku. Zertara? Itanduko dozu biar bada zeure kautan. Zetara, eta urre bila. Naiago nuke Keresusen urreak baino geiago arkituko balitukez lurralde bakar areitara joan diran euskaldunok. Bai, merezi dau adur obeagorik gure Aurre onak. Eztauka beste ametsik, txanpon batzuk egin eta barriro Euzkadiratzeko baino. Neuri itzi daustaz bere olerkiak eta idazkina gordeteko. Olerkiak txukun bildu eta idatzita daukaz al dabenean argitaratuteko. Lengo idazkian be esan neutsun, baino gaurkoan be barriro esan bear dautsut: Noiz emengo dauskuz Jaun Onak bi miloi (gaur geitxuago) gure idazle maiteak eta euskera dagozan leze ilunetik atarateko?

        Biar doiaz nire ilobak Bilbaora eta etzi or izango dira. Esan dautset zuri agertu bat egiteko, baina eztakit ba, beti ibilten baitira astiz urri. Gure Bergilirena, erdi amaituta daukat. Beste lan andi bat darabilt eskuartean: «Erbestealdiko Euskal-elertia». Berrogetaz erbestaldiko idazleen izenak batu dodaz eta gure elerti-arloan ez txatxarrenak. Olabidekin asi naz eta onen saila amaitu dut eta emen argitaratuko dan aldizkari berezi batean agertuko da. Ondoren Orixe, Zaitegi, Larrakoetxea, Etxeberria eta ainbeste eta ainbeste. Goxoak jarriko dira nik dakidazan batzuk, nire Olabiderena irakurtzen dabenean, batezbe Eganeko kritikalaria eta Historia de la Literatura Vascaren egilea. Eurak beizen eskubide jatorrak ditugu guk ere, nai duguna idatzi eta esateko. Ezteritxozu?

        Biar baino geitxuago luzetu naz. Laster jaritxiko al dozu zeure euskarako baimena be. Ortik datorkuzan opor-aizeak pozgarriak dira. Zabalduko ete aurten orrako bideak? Ai alan balitz.

        Eskumunak Aita Linori eta zuk artuixuz erbestetu onen euskal-agurrik beroenak.

        Izan ditut Zaitegiren barriak, Platonena eztot oindino ikusi eta erpai be banago irakurteko. Kritika bat eskatu daust, baina eztakit nun argitara al izango dodan, gure Euzko-Gogoa ilda gero.

        Betorkigu Jel'en erreinua. Amen.