—150—

JOKIN ZAITEGIri

Arrasatera

Caracas, 1956-II-24

        Adiskide:

        Gaur zortzi iritxi nintzan uri andi ontara ibilaldi atsegin bat egin ondoren. Maiketia-ko aize-ditxoan ainbeste aide ta adiskide arkitu nitun zai. Arrezkero ene emengo bizitza, atergabe batera ta bestera ibiltzea izan da, lanbideren bat bilatzeko batez ere. Itz ederrak bildu ditut, eta laister itzok mamitzea ere baliteke. Lan zelai zabala agertzen zait emen begien aurrean, atinez aukeratu bear ordea neretzat egokien izango dana. Au ez da guk urte-samalda lenago ezagutu genun uri paketsu ta itxusi xamarra. Ez du arrezkero aldaketa makala egin. Arrituta gelditu naiz. Laister guk ezagutu genitun kale zar aietatik ez da batere geldituko, ezta igaro aldien aitortzat ere.

        Zenbait euskaltzale ikusi ditut, gure adiskideen artekoak batez ere. Emen arkitu dut Ametzaga. Ez genun alako itz-asperturik egin. Oraindik ez daki zer egingo dun. Bear bada, Montevideora joango da berriz ere. Emen dagoenetik ez omen die uki-aldi bat ere eman bere euskal-lanei. Au ez duzu guretzako, Andima! esan zidan, merkatari larrulodientzat baizik. Eusko-etxean, erdel uiolpean murgildurik ari zaizkigu; neke da euskerarik entzutea. Auxe lotsagarriena. Ala ere badira gazte jator zenbait, egokera ori alda nai luketenak. Or ikusiko zer egiten duten. Emen arkitu ditut Olariaga, Ugalde, Irizar eta abar. Zure galdea egin zidaten eta zer asmo dituzun Euzko-Gogoari buruz. Zerbait esan nien. Orra nere gaurdainako lana emen, ibili batera ta bestera eta itz egin ugari.

        Eskuartean ditukezu nonbait, Guatemalatik igorri nizkitzun eskutitz eta bertzeak. Astun xamarra zan eskutitza. Dana dala esaidazu arren, eskura ote zaizkitzun ala ez, nere pakerako badare. Oraindik kontu labur bat emateko daukatzut, otsailean bilduena alegia. Oso gutxi izan zan. Ala ere egunen baten bialiko dizut zeatz meatz, ortako idazkizunak emen dauzkat eta. Mameme oraindik an utzi nun. Oso ondo arkitu nun; baketsu ta osasuntsu. Ni San Salvadortik igaro nintzan, ez nun ordea inor ikusi aize-ditxoan. Jakina nik ez nion inortxori ezer gaztigatu, ezpainekin. Pozik agurtuko nun alare, On Rogelio.

        Dana dala, emen naukazu beti bezela euskeraren alde lan egiteko gertu. Ikusi egin bear nun ta nola. Esaidazu beintzat aldizkariaren inguruan zer asmo darabiltzun guk emetik zer egin dezakegun ikusteko. Miranderen poema-liburua irartzeko gertuta erakutsi zidaten emen; baleike laister argitaratzea ere.

        Goraintzi asko orko adiskideei, eta zuretzat euskal-agurrik biozkorrena.

        Zuzenbidea: Santa Bárbara a Tienda Honda - Edificio Torino, Apartamento 8 - Caracas.