POSTA KUTXA

gutuna igorri berri diot preso lagunari,

hogeitaka urte daramatza gatibu

ez dakit zehazki zergatik ari den

horren kondena eternoa betetzen,

uste dut berak uste duela nik uste dudala

inor kaltetuko zuen zerbait gogorra egin zuela

bere herriaren alde,

eta justizia etsaiaren horma beti hor zegoela zain

askotan galdekatzen naute gauzek:

saxofoi baten ilegurizko bilgarria

maskara higienikoak ur zikinetan

bide ertzeko ogi birrinak,

badira ordea herio eldarniotan ere

egin ezin diren itaunak

ez dakit ezer baina

beharbada norbait hiltzea

edo larri zauritzea egotziko zioten

beharbada galera handiak eragingo zituen

inoren ondasunetan edo osasunean, ez dakit

hala ere ez dut uste etxera osorik iristen bada

horri buruz hitz egingo dugunik inoiz

jakin denok dakigu esklaboak daudena

gu bizi garen kalean

denok dakigu poliziak abusatu egiten duela,

bortxak gainezka egiten du

sukalde eta logeletan lantokietan,

haatik ez dugu aipatu nahi izaten non hasi zen dena

eta horrelako gauzen gainean

labainka doa gure bizialdia

kutxa horiko aho zuloan sartu dut gutuna,

uste dut berak uste duela nik uste dudala

hor nonbait badela oraino gu bion neurriko

paperezko herri bat