BIGARREN LOA

hitzek durundi egiten didate

ahosabaian

lo zirenen begiak guztiak batera

zabaldu balira bezala,

gau lehenean

isiltasunak iratzarri egin du jendea

gaixo-ordurako gorde nahi ditut

garai bateko irriak eta

orain ukitu ezin ditudan

azalera kuttunak:

inork espero gabe

hormatzen dira eskuak

altzarien ondoan

iragan honen diseinuak

nonbaiten behar zuen egina:

bilbea gama konposizioa

gizon-emakume zintzoen lana da,

maite ez dituztenen alde

beharrean ari direnak

norbait dabilkit ahosabaian

esku-argia hartuta:

arren ez esan gaur ere

beste nonbait jokatzen zenik dena

garai zailetan

animalien lorratzen aieruz

elkarrengandik urrun

hartuko gaitu bigarren loak

laster haziko da sasia

hitzen artean eta

ubideak egingo dituzte autopistak

gu bizi izandako egunen gainean

esan dute badirela hamar urte

hemen borroka armatuaren

adiera lokal bat akitu zela