AZKEN LAN EGUNA

haize hau hegokoa edo iparra den

igarri ezinean nabil,

haizeak jendea darama abailan

gauaren argia

goizaren itzalak

honaino heldu naiz:

ez dut inoiz garbi jakin non nengoen

bai noren ondoan ordea

samurra izan da porrot hau,

beharrezko jotako borrokak

euren lokatz eta sasiz

maiteminduta nago

eta jakin nahi dut zeren,

horretan izan da hemengo askoren ekina

oraindik ez dakigun zerbaiten alde

ematea ia dena

azken bider miatu dizkiot egunari ertzak:

gauza ederren akordua

amaraun hariak

ezin antzeman diot

non jartzen nauen

eman ez dudan guztiak

bertan egon ez naizen

bihotz haien guztien taupaden durundiak

maiteminduta nago:

haizeak abailan darama jendea

gauaren argia

goizaren itzalak

baliteke gurea ere

aski ikertu gabe ahaztuko den

kasu bat izatea