ITXARONGELAN

diotenez laster jakingo dugu

Richter eskalan zenbatekoa den

larrimin honen eragina

non den artega honen epizentroa

azpiko erroen mugimendu telurikoa

itxarongeletako hitzorduetan

nire zalantzen bazkaleku diren gogoetek

ez dute ez amaierarik ez azken hitzik

hazten ari den izu-laborriari

biopsia egin beharko zaiola diote

bizitzaren eta heriotzaren arteko etena

handitu ez dadin

hasperen aldi bakoitzean

amesgarriak diren garaiak ditut xerkatzen

etorriko diren ikarak garaiz igar ditzagun

argiloaren ostean hausturak osatuz usu

zure bufandaren hotza jantzi dut

eta egunero egiten dut topo itxaropen higatuekin

gertuen dagoen izarrartearekin

dena idatzita gelditu da

ederra izango da mendekua