ZENBAT BIDER

zure zubiak besarkatzean jakin gura nuke

edonora eramango nauen trenik baden

ihesbiderik baden

desertura doana

zugana doana

pentsamenduak patrikan ditudala

urrutiminen egoitzetara gura dut

baina noraino hel daitekeen bat galdetzen dut

etorkizunaren zabalera zenbatekoa den jakin gabe

zer esan nahi didazun badakit

maiz besteren atoiak garamatza gu ere

alde batetik besterako zeharkaldian

hutsuneak nola bete ez dakigula

egiten dugu aurrerantz horretara

libre izan arren ez zara aske sentitzen

ikusten ez diren mugek osatzen dute zure barrutia

gogoan dut oraindik zure ahotsaren urratua

gogorik gabeko keinu hutsala

horregatik itzuli da soa nigana

erreka-lainotik

etorriko dira

azalpen beharrik ez duten biharamunak

arrapostu gabeko galderez beteta

aingurak altxatzeko indarge

sinets iezadazu

gau beltzaren hurbiltasunak

ederrago egiten du eguna

eta galdetzen jarraitzen dut

zenbat bider hil behar ote den

behin bakarrik bizitzeko