Kanta espirituala

Seinaleak, brodatu arraroak

Marrazten ditu lore-sail dardarti batek.

Jainkoaren arnasa urdinak haize

Lorategiko sala barrura,

Alai barrura.

Mahasti basatian gurutze bat zutik.

Entzun herrikoen poza,

Lorezaina harresi ertzean segan,

Organo bat joka otzan,

Nahasiz doinua eta urrezko distira,

Doinua eta distira.

Maitasunak ogia eta ardoa bedeinkatzen ditu.

Neskatilak ere barrurantz

Eta oilarrak azkenari kukurruku.

Burdin sare herdoildu bat emeki doa

Eta arrosazko koroa eta ilaretan,

Arrosazko ilaretan

Maria zuri eta eder atsedenean.

Eskalea hor harri zaharrean

Otoitzean hilda bezala,

Artzain bat muinotik astiro doa

Eta aingeru bat kantari zuhaizpean,

Ondoko zuhaizpean

Haurrak lo harrarazten.