ZAPATUA DA GAUR

                        larregizko pisua dute ziegetako ateek,

                        horregatik zarratzen dira

                        hain astiro eta hain baldar

Bisita eguna da gaur.

Eta horrelakoetan

inoiz baino burdinago

izaten dira ateak,

beti sekulako zarratuta egoteko

hautua egina balute bezala.

Ziegako litera gainean agonduta,

hona ekarriko zaituen

furgonetan imajinatu zaitut.

                        eta leihoetako ganduan

                        zure begiak bilatu ditudanean

                        hantxe aurkitu ditut

                        nire beldurrak eta ametsak,

                        hantxe aurkitu zaitut

                        zeu ere, honanzko bidean,

                        irribarre behartua

                        maitasun keinu bihurtzeko

                        gai izango ote zaren

                        zeure buruari galdez

Erabakita zatoz

furgonetako kristaletan

lozorroan geratu diren

euri tantak biltzea dela hoberena,

zure begietatik barruragoko

bihotzaren putzuan gorderik

igeri egin dezagun luzaroan.

                        eta hitzen ordez

                        bidaian bildutako

                        tanta horiek

                        egingo digute kantu

Bisita eguna da gaur.

Eta horrelakoetan

inoiz baino biziago

egoten naiz, urduriago.

Hoztuta neguan,

udagoieneko

orbelarekin ametsetan;

egosita udan,

udaleheneko

euri tantak zenbatzen.

Ziegako litera gainean agonduta,

errepidean imajinatu zaitut,

txingor-euritan, haize erauntsietan,

ametsen gerizpean elkar topan:

zu nire bila eta ni zure zain.

Eskutik helduta akaso gaur

itsasoa ikustera eroango nauzulakoan.

                        eta biluzik sartuko gara uretan

                        elkarren zauriak osatzera

Bisita eguna da gaur.

Eta horrelakoetan

inoiz baino burdinago

izango dira agurrak ere,

larregizko pisua dutelako

ziegetako ateek bezainbat.

Itxi ditzadan begiak, hortaz,

zuk honanzko bidean

bilduko duzun euripera

murgil egingo dugun esperoan.

Zelatariak ateak

zabaldu ditu eta

banoa zure bila,

hain urduri eta hain bizi

izurde gazte bat bezala.

                        eta biluzik igeri egingo dugulakoan

                        lepotik zintzilik daroat toalla

Bisita eguna da gaur.

Hortxe zaude zu, zutik,

telefonoa eskuan eta

udagoiena soinean.

Hementxe nago ni, isilik,

udaleheneko zure begien

zazpi itsasoetatik edan guran.

Kristal blindatuaren kontra

elkartu dira gu bion eskuak

eta olatu zipriztinek laztandu dituzte

gure irribarreak eta lotsak.

                        ilargiaren alde ezkutuan

                        beti sekulako gordeko ditut

                        zure euriak eta laztanak